[624] สิตฺถาวการเก ‘‘กจวรํ ฉฑฺเฑนฺตํ สิตฺถํ ฉฑฺฑิยฺยตี’’ติ จ ‘‘กจวรํ ฉฑฺเฑนฺโต’’ติ จ ปาโฐฯ
กพฬวคฺควณฺณนา นิฏฺฐิตาฯ
6. สุรุสุรุวคฺควณฺณนา
[627] ‘‘สุรุสุรุ’’นฺติ จ ‘‘สุโรสุโร’’ติ จ ปาโฐฯ สีตีกโตติ สีตงฺโกฯ ‘‘สิลกพุทฺโธติ อริยานํ ปริหาสวจนเมเวต’’นฺติ ลิขิตํฯ
[631] ปฏิกฺกูลวเสนาติ เอตฺถ ยทิ ปฏิกฺกูลวเสน ปฏิกฺขิตฺตํ, ‘‘เสยฺยถาปิ กามโภคิโน’’ติ น วตฺตพฺพํฯ น หิ เต ปฏิกฺกูลํ กโรนฺตีติ เจ? น, อิสฺสริยลิงฺควเสน คหณสมฺภวโตฯ เต หิ อนาทรา โหนฺติฯ ปตฺตโธวนนฺติ ปตฺตโธวโนทกํ โภชนปฏิสํยุตฺตํฯ
[634] ‘‘ฉตฺตปาทุกาย’’นฺติ จ ‘‘ฉตฺตปาเท’’ติ จ ปาโฐฯ
[637] จาโปติ สตฺตขาทนวโธฯ ‘‘เสสา สพฺพา ธนุวิกติ โกทณฺเฑ ปวิฏฺฐา’’ติ จ ลิขิตํ, ปฏิมุกฺกนฺติ ปเวสิตํ, ลคฺคิตํ โหตีติ อตฺโถฯ
สุรุสุรุวคฺควณฺณนา นิฏฺฐิตาฯ
7. ปาทุกวคฺควณฺณนา
[640] สยํ ยานคโต หุตฺวา, ยถา ยานคตสฺส เวฯ
อลํ วตฺตุํ ตถา นาลํ, สฉตฺโต ฉตฺตปาณิโนฯ
ยถา เอตฺถ, เอวํ อญฺญตฺราปิฯ
[647] ฉปกวตฺถุสฺมิํ ‘‘สจาหํ น ลภิสฺสามี’’ติ ปาโฐ, ‘‘ทส เจ น ลภิสฺสามี’’ติ จ อตฺถิ, ‘‘วตฺถุสฺมิํ อคิลานสฺสา’’ติ จ อาคจฺฉติ, ตํ น สุนฺทรํ, สิกฺขาปเทเยว สุนฺทรํฯ
โถมิโตติ อหมฺปิ ชานามีติ สมฺพนฺโธ ฯ ยา ธนยสลาภสงฺขาตา วุตฺติ วินิปาเตน โหติ สมฺปราเย อปาเยสุ วินิปาตเหตุ หุตฺวา ปวตฺตติฯ อถ วา วินิปาเตนาติ เหตฺวตฺเถ กรณวจนํ, วินิปาตนาย ปวตฺตตีติ อธิปฺปาโยฯ อธมฺมจรเณน อธมฺมจรณายฯ ‘‘อสฺมา กุมฺภิมิวา’’ติ จ ปฐนฺติฯ
ปาทุกวคฺควณฺณนา นิฏฺฐิตาฯ
ปกิณฺณกวณฺณนา
กายวาจาจิตฺตโต สมุฏฺฐหนฺตีติ กตฺวา ‘‘สมนุภาสนสมุฏฺฐานานี’’ติ วุตฺตานิฯ สมนุภาสนํ กิริยํฯ อิมานิ กิริยานิฯ ธมฺมเทสนสมุฏฺฐานานิ วาจาจิตฺตโตติ เอตฺถ กายวจีวิญฺญตฺติภาวโต อุชฺชคฺฆิกอุจฺจาสทฺทาทีสุ วิย ‘‘กายวาจาจิตฺตโต’’ติ วตฺตพฺพานีติ เจ? น วตฺตพฺพานิฯ นิสีทนคมนาหารปกฺขิปนาทิกายวิญฺญตฺติยา สพฺภาวา ตตฺถ ยุตฺตํ, น ธมฺมเทสเน ตาทิสสฺสาภาวาฯ
ปกิณฺณกวณฺณนา นิฏฺฐิตาฯ
เสขิยกณฺฑวณฺณนา นิฏฺฐิตาฯ